bluerain

Tiene vez
ta olvida tu el mga cara, nombre, lugar y mga palabra para crea un descripción
na ciudad donde tu ya engranda, mas difícil si ya dura tu no-hay volve o si
hende man, hende tu tanto ta usa el di tu lenguaje firmé. El di mi memoria tiene vez ta juga con di mi
cabeza, como un ‘puzzle’, calayat y nuay
na lugar; como un película donde el un gente ta suña - un sueño pero pedazo y
tiene vez no-hay man cosa quiere decir, basta lang.

Tiene vez,
ta acorda yo el casa del mi aguela na calle carmen. El casa na entra medio de agua, el taytayan,
el ‘quadrosonic’, el prito huevos. Na di
mi sueno, como bata yo ule, ta corre na aplaya, mi tata ta pesca na aplaya, el
arena blanco, el sol de tarde, y el boulevard. Y el Tumaga, el otro sitio donde yo ya engranda también - el rio
de Tumaga, el ‘hanging bridge’ (donde si de veras tu hombre necesita tu brinca!
Mga locuras y tonterías cuando mga bata pa kame ay ta cre gayot!). El mga palabras cuando mga bata pa kame, ay
no puede usa na casa – ‘chingga!’, ‘coño ‘bu nana!’, ‘cabron!’ – si hende ay
hinca tu un hora na sal!

Bien facil
olvida todo este. Mas facil si lejos ya
tu na lugar donde tu ya engranda, mucho cosas ta perde ya na di mi memoria.
Cuando antes todo las cosas simple y no-hay complicación, ahora todo necesita
razón, necesita explanación, y necesita practícal. Tiene vez, mas bastante era si todo cosas mas
apacible. Pero antes aquel, otro ya
ara. Pero masquen donde man yo llega na
otro parte del mundo, na mi corazon, ay esta yo zamboangueño - hasta para
quando.

- bluerain

(hell! what am i thinking? - posting my HS pics! anyway, unless somebody discovers this blog, i’m doing this for posterity sake!)